ფიზიო 0,9% (ნატრიუმის ქლორიდი) 30მლ ნაზალური სპრეი

ცხვირის ღრუს დაავადებების სამკურნალო საშუალება.
საერთაშორისო სახელწოდება:  ნატრიუმის ქლორიდი.
ფარმაკოლოგიური ჯგუფი: ცხვირის ღრუს დაავადებების სამკურნალო საშუალება.
ათქ კოდი: R01AX10.
წამლის ფორმა: 0,9% ხსნარი - ნაზალური სპრეი.

აღწერილობა: უფერო გამჭირვალე ხსნარი, სუსტი დამახასიათებელი სუნით.

შემადგენლობა: ,,ფიზიო’’-ს ნაზალური წვეთები და სპრეი შეიცავს: 

ნატრიუმის ქლორიდის - 6,5მგ/1მლ (0,65% ხსნარი) ან 9მგ/1მლ (0,9% ხსნარი);

დამხმარე ნივთიერებები: მეთილპარაბენი, დინატრიუმის ედეტატი, ნატრიუმის დიჰიდროფოსფატის დიჰიდრატი, ნატრიუმის ჰიდროფოსფატის დიჰიდრატი, გამოხდილი წყალი.

ფარმაკოლოგიური მოქმედება: ,,ფიზიო’’ 0.65% და 0,9% წარმოადგენს ნატრიუმის ქლორიდის ხსნარს (შესაბამისად – ჰიპოტონურს და იზოტონურს), რომელიც ატენიანებს ცხვირის ღრუს ლორწოვან გარსს, აჯირჯვებს შესქელებულ ლორწოვან გამონადენს, აიოლებს მის გამოდევნას ცხვირის ღრუდან, აუმჯობესებს ცხვირით სუნთქვას. არბილებს ცხვირის ღრუში ლორწოვან გარსზე წარმოქმნილ ფუფხს და ხელს უწყობს მის მოცილებას. პრეპარატი ხსნის ცხვირის ლორწოვანი გარსის შეშუპებას და ხელს უშლის ოტიტის განვითარებას. ასევე აღსანიშნავია ისიც, რომ, ცხვირის ოპერაციის შემდგომ პერიოდში გამოყენებისას პრეპარატი ხელს უწყობს კანის მკვდარი უჯრედებისა და ქერქლის მოცილებას, რაც ამცირებს სისხლდენას.

ფარმაკოკინეტიკა: ადგილობრივი გამოყენებისას აბსორბცია დაბალია.

ჩვენებები:  

• გამოიყენება ცხვირის ღრუს ლორწოვანი გარსების ჰიგიენური დამუშავებისათვის მოზრდილებსა და ბავშვებში (0.65% ხსნარი – ჩვილებშიც), ცხვირის ღრუს სწრაფი და იოლი გასუფთავებისთვის ბლანტი ლორწოსა და ფუფხებისაგან.

• ცხვირის ღრუს, ცხვირ-ხახის ლორწოვანი გარსის სხვადასხვა ეტიოლოგიის ანთებითი დაავადებები (ინფექციური, ალერგიული რინიტები, ქრონიკული ატროფიული რინიტი; რინოსინუსიტი; რინოფარინგიტი), რომლებსაც თან ახლავს ცხვირის ლორწოვანი გარსის სიმშრალე ან ლორწოს გამოყოფა;

• ცხვირის ღრუს, ცხვირ-ხახის, ცხვირის დანამატი წიაღების ანთებითი პროცესების პროფი¬ლაქტიკა (ჰაიმორიტი, ფრონტიტი, სინუსიტი), ოტიტის პროფილაქტიკა ეპიდემიის გამწვავების პერიოდში; 

• ცხვირის ლორწოვანი გარსის გასუფთავება და დატენიანება პროფესიული მავნე ნივთიერებებით (საღებავები, მტვერი, ფქვილი) დაბინძურებულ გარემოში ან კონდიცირებულ შენობაში ხანგრძლივად ყოფნისას.

• ცხვირის ოპერაციის შემდგომ პერიოდში, მკვდარი უჯრედებისა და ქერქლის მოსაცილებლად.

• კომპლექსური მკურნალობის პერიოდში ხელს უწყობს ცხვირის ღრუდან სხვა სამკურნალო საშუალებების შეწოვას;

უკუჩვენებები: 

• მომატებული მგრძნობელობა პრეპარატის შემადგენელი კომპონენტების მიმართ. 

• 0.9% ნაზალური სპრეისთვის - ბავშვთა ასაკი 1 წლამდე.

გვერდითი მოვლენები: შესაძლებელია ცალკეულ შემთხვევებში გამოვლინდეს ალერგიული რეაქციები, რაც გამოიხატება ცხვირის ლორწოვანი გარსის გაღიზიანებაში.

მიღების წესი და დოზირება: სამკურნალო-პროფილაქტიკური საშუალება გამოიყენება ინტრანაზალურად.

0.65%-იანი ნაზალური წვეთები: ერთ წლამდე ასაკის ბავშვებში: 1 წვეთი თითოეულ ნესტოში 3-4-ჯერ დღეში, ერთი წლის ზემოთ ასაკის ბავშვებში: 1-2 წვეთი თითოეულ ნესტოში 3-4-ჯერ დღეში, უფროსებში: 2 წვეთი თითოეულ ნესტოში 3-4-ჯერ დღეში.

0.9%-იანი ნაზალური სპრეი: ფლაკონს იკავებენ ვერტიკალურ მდგომარეობაში და ხსნარს შეასხურებენ თითოეულ ნესტოში. შესხურებიდან 2-3 წუთის შემდეგ საჭიროა ცხვირის ღრუს გასუფთავება. მოზრდილებსა და 3 წლის ზემოთ ბავშვებში საჭიროა 0.9% სპრეის 2 შეფრქვევა 3-4-ჯერ დღეში (აუცილებლობის შემთხვევაში, მეტჯერაც).

1-დან 3 წლამდე ბავშვებში - 0.9% სპრეის 1 შეფრქვევა 3-4-ჯერ დღეში.

პროფილაქტიკური მკურნალობისას პრეპარატის გამოყენება შესაძლებელია 1 – 4 -ჯერ დღეში. 

მკურნალობის კურსის ხანგრძლივობაა საშუალოდ სამი კვირა; მკურნალობის განმეორებითი კურსი შესაძლოა ჩატარდეს 30 დღიანი შესვენების შემდეგ. პროფილაქტიკური მკურნალობის დროს პრეპარატის გამოყენებამდე აუცილებელია ცხვირის ღრუს გასუფთავება. 

განსაკუთრებული მითითებები: არ არის რეკომენდირებული ერთი ფლაკონის გამოყენება სხვადასხვა ადამიანის მიერ, რათა თავიდან იქნას აცილებული ინფექციის გავრცელება.

გამოყენების შემდეგ ფლაკონის ბოლო უნდა გაიწმინდოს.

ორსულობა და ლაქტაცია: ,,ფიზიო’’-ს გამოყენება ორსულობისა და ლაქტაციის პერიოდში რეკომენდირებულია. 

ურთიერთქმედება სხვა სამკურნალო საშუალებებთან: დაბალი აბსორბციის უნარის გამო სხვა პრეპარატებთან ურთიერთქმედება არ არის გამოვლენილი. 

შეფუთვა: 

10მლ 0,65% ხსნარი პოლიეთილენის ფლაკონში საწვეთურით. ფლაკონი მოთავსებულია მუყაოს კოლოფში ანოტაციასთან ერთად.

30მლ 0,9% ხსნარი თეთრი ფერის მაღალი სიმკვრივის პოლიეთილენის სპრეის ფლაკონში გამფრქვევით. ფლაკონი მოთავსებულია მუყაოს კოლოფში ანოტაციასთან ერთად.

შენახვა: ინახება სინათლისაგან დაცულ ადგილზე, არაუმეტეს 25°с ტემპერატურის პირობებში. 

ფლაკონის გახსნის შემდეგ პრეპარატი ვარგისია 1 თვის განმავლობაში. 

ვარგისობის ვადის გასვლის შედეგად პრეპარატის გამოყენება დაუშვებელია!

აფთიაქიდან გაცემის წესი: ფარმაცევტული პროდუქტის ჯგუფი - III (გაიცემა ურეცეპტოდ).

ვარგისიანობის ვადა:  2 წელი.